• اخرالمواضيع

    بالصور طريقة تحضير اللوز و الكوكاو المفسخ للحلويات و أسرار نجاحها

     
    بالصور طريقة تحضير اللوز و الكوكاو المفسخ للحلويات و أسرار نجاحها

    في هاد الموضوع غادي نشوفو أمر مهم كيخص الاساس ديال الحشوة ديال حلويات اللوز او حلويات الكاوكاو و اللي هما : اللوز و كاوكاو كيفاش نحضروهم و كيفاش نطحنوهم لانه اي خلل فيهم كينعكس على الحلوة في هاد داتها و كتولي تقولي ايوة ما عرفتش علاش جاتني الحشوة خايبة ...الخ
    ادن على بركة الله نشوفو اول خطوة مع اللوز

    بالنسبة للوز
    كنشريو دائما اللوز الرومي اللي تكون حبته غليظة او كيف كانقولو كيكون ملحم ماشي البلدي لانه هاد الاخير كيكون رقيق و كدلك ما كيخرجش في الطحين
    دابا غادي نجيو نوجدو اللوز
    كناخدو اللوز كنديروه في كاصرونة و كنعمرو عليه بالماء و نديروه فوق النار بمجرد تطلع فيه الغلية الاولى و التانية و نطفيو عليه ثم كنبداو نضفيو بشوي بشوي و كنفركوه و هو ما زال سخون لانه ادا برد ما كايباقش يبغي يتفسخ و اي حاجة فسخناها كنوضعوها فوق شي بلاطو اللي نكونو مفرشينه من قبل بشي سربيته اللي تكون تشرب الماء بحال اللي كنمسحو بيها الكيسان ،
    دابا كندوز الخطوة المهمة و اللي فاش كنسليو الكمية ديالنا كنعاودو نوضعو الكمية ديالنا ديال اللوز فشي بلاطو اخر يكون مفرش كيف العادة و نفرشو عليه اللوز ديالنا و نغطيوه و نخليوه لمدة ليلة كاملة حتى ينشف مزيان وهاد الخطوة مهمة بزآآآآآآآآآآاف لازم اللوز يبات ليلة ماشي نشفوه و نطحنوه هاديك الساع .
    في الغد نطحنوه،بالنسبة للكمية ديال السنيدة اللي كتطحن مع اللوز كتكون دائما نصف الكمية ديال اللوز ،هنا كاين اللي كيطحن اللوز مع السكر كلاصي او السكر سنيدة ،انا بالنسبة لي و من الاحسن تعملو سكر سنيدة لانه في الطحين كيجي زوين و حتى في الطياب كيجي اروع ،



     
    بالنسبة لطريقة الطحين كتكون على مرحلتين

    في الاولى
    :
    كنطحنو اللوز نصف طحنة و بدون سكر سنيدة ،يعني ما نطحنوش مزيان غير كتبدا دور المكينة و كنطفيو و راه الصور كنظن موضحة كيفاش يكون

    في التانية :

    كنبداو نطحنو الكمية ديالنا مع السنيدة شيئا فشيئا حتى نسليو الكمية كلها و هنا كنطحنو اللوز مزيان ،ماشي تاني مزيييييييييييييييان غير غيبان ليكم بانه طريفات صغار ديال اللوز ما بقاوش و غادي تلاحظو انه بعض حبات السنيدة ما زالت كتلمع  و هدا هو الحد،و هنا صافي اللوز واجد.

    بعد الطحن :

    لازم تغطيو اللوز ديالنا ببلاتسيكة مانخليوهش عريان باش ما ينشفش لينا و كدلك بعد ما نخلطوه مع العناصر الاخرى ديال الحشوة نغطيوه كدلك ببلاستيك باش ما ينشفش كلدلك ،دكرت هنا عناصر الحشو الاخرى و اللي منها الزبدة و ماء الزهر هنا لازم تنتابهو تلتازمو بكمية الزبدة و كدلك ماء الزهر لانه اللوز ماشي بحال كاوكاو راه ما كيشربش بزاف لازم الحشو ديالو تكون شادة في راسها شوي 




    بالنسبة للكاوكاو
    كاوكاو اللي كنستعملوه هنا هو كاوكاو الرومي المفسخ  و راه موجود

    للتحضير دياله :
    كنقليوه في الزيت في كمية محددة ما تكثروش الزيت لانه الزيت دياله ما يمكنش تعاودي تستعمليه بحال ديال اللوز ،لانه هاد كاوكاو الرائحة دياله مجهدة و قاصحة شوية و الزيت كتولي رائحتها لا تطاق لهدا ما تكثروش الكمية ديال الزيت باش ما تضيعوهاش

    بالنسبة للقلي
    لازم تنتابهو لانه دغية كتشد فيه العافية و دغيا كيتحمر ،كيف يبدا يندهب اللون دياله تبداو تقلبو قيه و غادي تزيدو شي لحظات قليلة و تبداو تحيدو فيه لانه فاش كتحيدوه و تعملوه يتسقطر في الشبكة راه كترجع عليه السخونية

    بالنسبة للطحن
    بعد ما كيبرد الكاوكاو كنبداو نطحنو فيه مع السنيدة و حتى هو نفس الشيء كمية الكاوكاو نصفها كمية السنيدة
    بعدما نطحنو الكمية ديالنا كنغطيوها كدلك ببلاستيك باش ما ينشفش لينا و حتى بعدما كنخلطو معاها العناصر الاخرى كنخليوها مغطية،هنا بالنسبة للكاوكاو راه كينشف و كيحتاج الزبدة بزاف ماشي بحال اللوز ،هنا غادي تبقاو تعملو الزبدة حتى ما تبقاش تحسو بانها كتفرتت (كمية الزبدة محددة في الوصفات)
    • تعليقات بلوجر
    • تعليقات الفيس بوك

    0 التعليقات:

    إرسال تعليق

    تعليقك يشجعنا على الاستمرار

    Item Reviewed: بالصور طريقة تحضير اللوز و الكوكاو المفسخ للحلويات و أسرار نجاحها Rating: 5 Reviewed By: Unknown
    Scroll to Top